Byggðasafn Reykjanesbæjar

Eins manns rusl er annars gull

Hvað eiga pennar, plastpokar, bíóprógrömm, servíettur og eldfæri sameiginlegt?  Á sýningunni eru smáhlutir af ýmsu tagi sem hafa verið framleiddir með ákveðið notagildi í huga. Þegar þeir hafa lokið hlutverki sínu enda þeir oftar en ekki í ruslinu. Til eru þeir sem hafa þó einsett sér að safna slíkum hlutum með það markmið að eignast sem flesta og af mismunandi gerðum. Annað atriði sem þessir smáhlutir eiga sameiginlegt er að þeir voru fjöldaframleiddir á árum áður en eru margir fágætari í dag. Stór hluti er merktur fyrirtækjum eða vörum og enda voru þeir ýmist gefnir, látnir fylgja með öðrum vörum eða seldir vægu verði. Hér gefst því tækifæri til að rifja upp liðna tíð og virða fyrir sér hvernig myndskreytingar og vörumerki hafa breyst. Elstu munirnir eru frá þriðja áratug 20. aldar en þeir yngstu aðeins nokkurra ára eða áratuga gamlir.

Litið í baksýnisspegilinn

Á sýningunni er litið í baksýnisspegilinn á skemmtileg augnablik sem hafa verið fönguð á mynd og staldrað við nokkrar af helstu vörðum bílvæðingar á Suðurnesjum. Í safninu er til fjöldi ljósmynda sem endurspegla þær miklu breytingar sem hafa orðið á samgöngum síðan fyrsta bílferðin var farin frá Hafnarfirði til Keflavíkur árið 1913. Betri vegir og aukinn fjöldi bíla í kjölfar síðari heimsstyrjaldar höfðu mikil áhrif, atvinnulíf efldist, vöruflutningar urðu einfaldari og ferðalög almennari.

Sýningin stendur til 12. apríl 2027.

Fast þeir sóttu sjóinn 

Í Byggðasafni Reykjanesbæjar eru varðveitt um 140 líkön af skipum og bátum. Langflest þeirra smíðaði Grímur Karlsson skipstjóri.

Grímur hófst handa við smíði líkananna um fimmtugt og safnaði af mikilli elju ýmis konar fróðleik um sögu sjávarútvegs á Íslandi. Grímur var afkastamikill og eftir hann liggja á fimmta hundrað líkön í eigu ýmissa stofnana og einstaklinga. Fyrir smíði sína var Grímur sæmdur hinni íslensku fálkaorðu árið 2009, Menningarverðlaunum Reykjanesbæjar það sama ár og Sjómannadagsorðunni 2002. Grímur lést árið 2017.