Duus safnahús

Listasafn Reykjanesbæjar

Sýningin Nína, okkar kærasta Nína varpar nýju ljósi á líf, verk og arfleifð Nínu Sæmundsson (1892–1965), eins merkasta frumkvöðuls íslenskrar höggmyndalistar. Nína lifði og starfaði stóran hluta ævi sinnar erlendis, frá Kaupmannahöfn og París til Bandaríkjanna, þar sem hún byggði upp farsælan feril sem myndhöggvari. Saga hennar hefur lengi verið sögð sem saga íslensku sveitastúlkunnar sem hélt út í heim og öðlaðist frægð, en í sýningunni er sjónum beint að öðrum hliðum á lífi hennar, verkum og tengslum.

Sýningin nálgast Nínu út frá hinsegin sjónarhorni og setur verk hennar í samtal við ný verk eftir Diljá Þorvaldsdóttur, Jo Pawlowska, Olgu Bergmann, Sabine A. Fischer og Victoria Ahrens. Listafólkið tekur verk Nínu sem útgangspunkt og opnar þau fyrir nýjum túlkunum þar sem meðal annars er fjallað um valfjölskyldur, nánd og umhyggju, sjálfsmynd, bernsku, náttúru og umbreytingu.

Listafólk: Nína Sæmundsson, Diljá Þorvaldsdóttir, Jo Pawlowska, Olga Bergmann, Sabine A. Fischer og Victoria Ahrens

Sýningarstýrur: Viktoría Guðnadóttir og Dr. Ynda Eldborg.

Byggðasafn Reykjanesbæjar

Hjá Byggðasafninu eru 3 sýningar. Þær eru: Fast þeir sóttu sjóinn er sýninga af 140 líkönum af skipum og bátum flest eftir Grím Karlsson, Eins manns rusl er annars gull á sýningunni má sjá smáhluti sem hafa verið framleiddir með ákveðið notagildi í huga. Þegar þeir hafa lokið hlutverki sínu enda þeir oftar en ekki í ruslinu. Litið í baksýnisspegilinn: Á sýningunni er litið í baksýnisspegilinn á skemmtileg augnablik sem hafa verið fönguð á mynd og staldrað við nokkrar af helstu vörðum bílvæðingar á Suðurnesjum. Í safninu er til fjöldi ljósmynda sem endurspegla þær miklu breytingar sem hafa orðið á samgöngum síðan fyrsta bílferðin var farin frá Hafnarfirði til Keflavíkur árið 1913. Betri vegir og aukinn fjöldi bíla í kjölfar síðari heimsstyrjaldar höfðu mikil áhrif, atvinnulíf efldist, vöruflutningar urðu einfaldari og ferðalög almennari

Gestastofa Reykjanessjarðvangs, UNESCO Global Geopark

Sýning um myndun og mótun Reykjanesskagans. Gestir geta fræðst um jarðfræði og náttúrufar á skaganum á einfaldan og aðgengilegan hátt. Markmiðið með gestastofunni er að miðla fróðleik og upplýsingum um Reykjanes jarðvang og Reykjanesskaga. Í tilefni þess að 50 ára afmælissýning HS Orku hefur verið sett upp í rými gestastofunnar hefur sýning gestastofunnar verið uppfærð og því um að gera að líta við og skoða báðar sýningar.

Hvers vegna fornbílar?

Hvað er það við gamla bíla sem heillar svo marga? Er það hönnunin, handverkið, minningarnar - eða einfaldlega tilfinningin sem fylgir því að setjast undir stýri á bíl með sögu?

Rúnar Sigurjónsson, formaður Fornbílaklúbbs Íslands, veltir fyrir sér spurningunni „Hvers vegna fornbílar?“ í fróðlegu og skemmtilegu erindi í Duus safnahúsum.

Erindið fer fram á sýningunni Litið í baksýnisspegilinn, þar sem rifjuð eru upp skemmtileg augnablik úr bílasögu Suðurnesja og staldrað við nokkrar af helstu vörðum bílvæðingarinnar á svæðinu. Ljósmyndir úr safneign Byggðasafns Reykjanesbæjar segja þar sögu mikilla breytinga – allt frá fyrstu bílferðinni frá Hafnarfirði til Keflavíkur árið 1913 til þess tíma þegar bíllinn varð órjúfanlegur hluti af daglegu lífi.

Með betri vegum og sífellt fleiri bílum breyttust ekki aðeins ferðalög fólks heldur einnig atvinnulíf, vöruflutningar og samfélagið sjálft. Verið öll velkomin – og að sjálfsögðu verður boðið upp á kaffi og kleinur. 

Bílar og hafmeyjur - fjölskyldusmiðja

Í fjölskyldusmiðjunni Bílar og hafmeyjur geta börn og fullorðnir búið til sínar eigin hafmeyjur og bíla, innblásin af sýningunum Nína, okkar kærasta Nína og Litið í baksýnisspegilinn. Komdu við í Duus safnahúsum og leyfðu sköpunargleðinni að ráða för!

Sögurnar á bak við verkin

Nína, okkar kærasta Nína. Sögurnar á bak við verkin

Hvaða sögur leynast á bak við listaverkin?

Verið hjartanlega velkomin í Listasafn Reykjanesbæjar sunnudaginn 18. október kl. 14:00 þar sem við fáum einstakt tækifæri til að kynnast verkum Nínu Sæmundsson í gegnum sögur þeirra sem eiga þau.

Ynda Eldborg, sýningarstýra, og Helga Þórsdóttir, safnstjóri, munu spjalla við eigendur verka sem nú eru til sýnis á sýningunni Nína, okkar kærasta Nína.

Í samtalinu fáum við að fræðast um tilurð verkanna, uppruna þeirra og hvernig þau hafa ratað í hendur núverandi eigenda. Hér gefst einstakt tækifæri til að heyra persónulegar frásagnir og öðlast nýja sýn á verk og arfleifð þessarar merku listakonu.

Við bjóðum öll hjartanlega velkomin til notalegrar og fróðlegrar stundar í safninu.