Listasafn Reykjanesbæjar

Heimsmynd – Áki Guðni Gränz

Í sýningunni Heimsmynd er horft til Áka Guðna Gränz (1925–2014), alþýðulistamanns sem skapaði sér einstaka stöðu í menningarlífi Njarðvíkur og víðar. Verk hans voru aldrei einungis eftirmyndir af landslagi eða fólki – þau voru persónuleg kortlagning á hugmyndaheimi hans, þar sem draumar, þjóðsögur og minningar blönduðust saman. Í þessum verkum speglast heimssýn manns sem hafði djúpa rót í samfélagi sínu, en líka ríkan innri heim sem hann miðlaði á sinn einstaka hátt.

Myndverk sýningarinnar eru úr safneign Listasafns Reykjanesbæjar, ásamt verkum í eigu fjölskyldu listamannsins. Áki hefði orðið 100 ára á þessu ári og mun sýningin heiðra minningu listamannsins með völdu yfirliti á verkum hans.

Hulduefni – Vilhjálmur Bergsson

Sýningin Hulduefni í Listasafni Reykjanesbæjar gefur mynd af þróun í verkum Vilhjálms Bergssonar frá 1959 til 2021. Sýningin spannar hátt í sex áratugi og dregur fram fágæta tæknilega færni hans og kunnáttu. Vilhjálmur lýsir snemma á ferlinum viðfangsefni sínu í myndlist sem víðtækri hlutdeild, þar sem allt milli himins og jarðar, frá minnstu ögn til stjörnuþoka, fellur undir rannsókn hans. Verk hans þróuðust frá abstrakt geómetrísku myndum yfir í það sem hann kallaði samlífrænar víddir og síðar takmarkalaust orkuljósrými, þar sem bæði ljós og myrkur spila mikilvægt hlutverk.

Sýningin byggir á gjöf Vilhjálms til Listasafns Reykjanesbæjar, sem inniheldur nær 200 verk, þar á meðal olíumálverk, vatnslit, teikningar og tölvuverk. Eitt af verkunum, Raðferli: 12 nr., kolteikning frá 2021, er í eigu listamannsins og sýnt með leyfi hans. Í skrifum sínum, sem hann byrjaði að semja sem ungur, lýsir Vilhjálmur tengslum á milli myndlistarsköpunar og hugleiðinga hans um myndlist og heiminn.

Hulduefni vísar til þess efnis í alheiminum sem er hulið sjón okkar, og er meira en þrír fjórðu alls efnis samkvæmt kenningum heimsfræði. Í verkunum sínum rannsakar Vilhjálmur, líkt og með hulduefni, óáþreifanlega og óséða þætti, þar sem ljós og myrkur mætast og líf og alheimur tengjast á dýpstu stigi.

Heimsmynd og Hulduefni standa til 4. janúar 2026.